உலகின் புகழ்மிக்க மூன்றாம் கற்பக விநாயகர்!

வெளிநாடுகளில் வாழும் இந்து பெருமக்கள் தங்களின் ஆன்மீக தேடல்களின் சங்கமமாக இருப்பது ஆலயம் என்றே கருதுகின்றார்கள். ஒரு நாட்டில் ஒரு குறிப்பிட்ட இடத்தில் வசிக்கின்ற இந்துக்கள் அனைவரும் சிறிய இடைவெளிகளில் ஆலயத்தில் ஒன்று கூடி பண்டிகை, விழாக்காலங்கள், குடும்ப மங்கள நிகழ்ச்சிகள், மாதப்பிறப்பு தினங்கள் ஆகியவற்றில் வழிபாட்டையும் மேற்கொண்டு கலாச்சாரம் மற்றும் பண்பாட்டு நிகழ்ச்சிகளில் பங்கு பெற்று மனநிறைவை அடைகின்றார்கள்.

எல்லா வெளிநாடுகளிலும் நிறைந்து காணப்படுவது வேதநாயக மூர்த்தியான கணேசப் பெருமானின் ஆலயமேயாகும். எளிமை மற்றும் கருணை ஆகியவற்றின் கூட்டே கணபதித் தெய்வம் என போற்றப்படுகின்றது. அனைவரும் எளிதில் வணங்கும் விதமாக எல்லா இடங்களிலும் கோயில் கொண்டு பக்தர்களின் வேண்டுதல்களை நிறைவேற்றுபவரும் இவரே.

தங்களுக்காக பக்தர்கள் செய்யும் வழிபாட்டு முறைகளும் நேர்த்தி கடன்களும் கூட மிகவும் எளிமையானதாக இருந்தால் போதுமானது என நினைக்கும் கருணை உள்ளம் கொண்டவர் வேத முதல்வரான விநாயக பெருமான். துவக்கத்தில் பக்தர்களுக்கு சில சோதனைகளைத் தந்து விட்டாலும், முடிவில் பக்தர்களின் அனைத்து வேதனைகளையும் களைந்து ஆனந்தத்தை அளிக்கக் கூடியவர் விநாயகர் ஆவார். எந்தவொரு இந்து மதம் சார்ந்த வைபவமாக இருந்தாலும் அங்கு விநாயகரை சந்தனத்தாலோ அல்லது மஞ்சளாலோ உருவாக்கி முன்னிறுத்தி வைத்து விடுவார்கள்.